మీ పిల్ల‌లు ఫోన్ల‌ను చూస్తూ ఆహారం తింటున్నారా.. అయితే జాగ్ర‌త్త‌..

పిల్లలు భోజనం లేదా చిరుతిండి తినే సమయంలో టీవీ, మొబైల్‌ లేదా ట్యాబ్లెట్‌ వంటి వాటిని చూడడం ఇప్పుడు చాలా సాధారణంగా మారింది. అయితే ఇలా స్క్రీన్‌ చూస్తూ తినడం వల్ల పిల్లలు తాము ఎంత ఆహారం తీసుకుంటున్నారో, నిజంగా ఆకలిగా ఉందో లేదో గుర్తించలేకపోయే అవకాశం ఉందని నిపుణులు చెబుతున్నారు. స్క్రీన్‌పై దృష్టి మళ్లడంతో ఆహారం రుచి, పరిమాణం, కడుపు నిండిన భావన వంటి సంకేతాలను పిల్లలు తక్కువగా గమనిస్తారు. అయితే స్క్రీన్‌ చూస్తే ప్రతి చిన్నారి తప్పనిసరిగా ఎక్కువగా తింటార‌ని చెప్పడానికి ఆధారాలు లేవు. పరిశోధనల్లో తక్షణంగా తీసుకునే కేలరీలపై ప్రభావం అన్ని సందర్భాల్లోనూ ఒకేలా కనిపించలేదు. అంటే స్క్రీన్‌ ప్రభావం పిల్లల ప్రవర్తన, ఆహారం అందుబాటులో ఉండడం, స్క్రీన్‌పై చూస్తున్న కంటెంట్‌ వంటి అంశాలపై ఆధారపడి ఉంటుంది.
ఎక్కువ ఆహారం తినే చాన్స్‌..
అయితే స్క్రీన్‌ చూస్తూ తినడం వల్ల ప్రభావం ఆ సమయంలో తీసుకునే ఆహారానికే పరిమితం కాద‌ని కొన్ని పరిశోధనలు సూచిస్తున్నాయి. భోజనం సమయంలో టీవీ చూడడం వల్ల తరువాతి భోజనంలో ఎక్కువ ఆహారం తీసుకునే అవకాశం ఉన్నట్లు 2025లో నిర్వహించిన ప్రయోగాత్మక అధ్యయనాల సమీక్షలో గుర్తించారు. స్క్రీన్‌పై దృష్టి కేంద్రీకరించడం వల్ల పిల్లలు తాము తిన్న ఆహారాన్ని సరిగ్గా గుర్తుంచుకోకపోవడం కూడా దీనికి ఒక కారణంగా ఉంటుంద‌ని భావిస్తున్నారు. దీనికి తోడు టీవీ కార్యక్రమాలు, వీడియోలు, ఆటల్లో కనిపించే ఆహార ప్రకటనలు, బ్రాండెడ్‌ ఆహార పదార్థాలు, రుచికరమైన తినుబండారాల దృశ్యాలు పిల్లల్లో ఆహారం పట్ల ఆసక్తిని పెంచే అవ‌కాశం ఉంది. సమీక్షించిన 35 అధ్యయనాల్లో 27 అధ్యయనాలు ఆహార ప్రకటనలు లేదా ఆహారానికి సంబంధించిన సంకేతాలతో ఎక్కువ ఆహారం తీసుకోవడాన్ని గుర్తించాయి.
ఎంత ప‌రిమాణంలో తింటున్నారు..?
స్క్రీన్‌తో పాటు ఎలాంటి ఆహారం తింటున్నారు, ఎంత పరిమాణంలో అందిస్తున్నారు అనేదీ ముఖ్యమే. ఉదాహరణకు పిల్లలు అరగంట పాటు కార్టూన్‌ చూస్తూ పక్కనే పెట్టిన బిస్కెట్లు లేదా చిప్స్‌ను తింటూ ఉంటే, తినడం ఎప్పుడు ప్రారంభమై ఎప్పుడు ముగిసిందో వారికి స్పష్టంగా తెలియదు. ప్యాకెట్‌ నుంచి నేరుగా తినడం వల్ల పరిమాణంపై నియంత్రణ కూడా తగ్గుతుంది. అలాగే టీవీ ముందు కూర్చున్న ప్రతిసారీ చిప్స్‌, బిస్కెట్లు, తీపి పానీయాలు లేదా స్వీట్లు ఇస్తూ ఉంటే స్క్రీన్‌ చూడడం, చిరుతిండి తినడం రెండూ ఒకదానితో ఒకటి అనుసంధానమయ్యే అలవాటుగా మారుతాయి. దీంతో ఆకలి లేకపోయినా స్క్రీన్‌ కనిపించగానే తినాలనే కోరిక కలిగే అవకాశం ఉంటుంది.
రెండింటినీ వేరు చేయాల్సిందే..
అందుకే పిల్లల ఆహారపు అలవాట్లలో స్క్రీన్‌ను పూర్తిగా నిషేధించడం కంటే భోజనం, స్క్రీన్‌ వినియోగాన్ని సాధ్యమైనంత వరకు వేరు చేయడం మంచిది. భోజనం, చిరుతిండిని భోజన ప్రదేశంలోనే ఇవ్వడం, అవసరమైన పరిమాణంలో మాత్రమే వడ్డించడం, ప్యాకెట్‌ను పిల్లల ముందు ఉంచకుండా ఉండడం ఉపయోగకరంగా ఉంటుంది. నీటిని ప్రధాన పానీయంగా ఇవ్వడంతోపాటు పండ్లు, పెరుగు, తగిన పరిమాణంలో గింజలు వంటి ఆరోగ్యకరమైన చిరుతిండ్లను ఎంచుకోవచ్చు. స్క్రీన్‌ చూస్తే ఆహారాన్ని బహుమతిగా ఇచ్చే అలవాటును కూడా తగ్గించాలి. పిల్లల బరువుపై ప్రభావాన్ని అర్థం చేసుకోవాలంటే స్క్రీన్‌ ఒక్కటే కాకుండా భోజన సమయాలు, నిద్ర, శారీరక చురుకుదనం, ఇంట్లో అందుబాటులో ఉన్న ఆహారం వంటి మొత్తం జీవనశైలిని పరిగణనలోకి తీసుకోవాలని నిపుణులు సూచిస్తున్నారు.